MÊRDÎN - Dayika Aştiyê Elîf Aslan a ku di têkoşîna azadiyê de 3 zarokên wê jiyana xwe ji dest dan, ji ber ku xwîn rijiya ser mêjiyê wê jiyana xwe ji dest da. 

 

Li navçeya Qoser a Mêrdînê Dayika Aştiyê Elîf Aslan a ku çend roj berê xwîn rijiyabû ser mêjiyê, li nexweşxaneya ku lê dihat dermankirin jiyana xwe ji dest da. Cenazeyê Elîf Aslan a 89 salî li gundê Izêr ê li herêma Xursê hat definkirin. 

 

Şîna Elîf Aslanê li Mala Şînê ya li Taxa Dundarlarê hat danîn. 

 

3 zarokên wê jiyana xwe ji dest dan

 

3 zarokên Elif Aslan li pey hev tevlî têkoşîna azadiyê ya Kurdan bûbûn û her yek ji wan di demên cuda de jiyana xwe ji dest dabûn. Keça wê, Sultan Aslan, di sala 1989'an de di pevçûnên li navçeya Stewrê ya Mêrdînê de jiyana xwe ji dest dabû û kurê wê, Mehmet Emin Aslan, jî di sala 1988'an de di pevçûnên li navçeya Dêrikê jiyana xwe ji dest dabû.

 

Keça Elif Aslanê, Emîne Aslan jî ku bi tohmeta "endamtiya rêxistinê" li Girtîgeha Girtî ya Jinan a Tîpa T a Hejmara 2'yan a Rihayê girtî bû, di 4'ê Kanûna 2019'an de ji vîrusa koronayê (Covid-19) li nexweşxaneya ku lê dihat dermankirin, jiyana xwe ji dest dabû.